Tematiser eir puncts dischagreabels per chatter soluziuns solidas a lungia vista.
lic. iur. Riet Ganzoni, LL.M LSE
Zieva il stüdi ed experienzas professiunelas a Turich e Londra es il Schlarignot turno in Engiadina. Lo spordscha’l daspö il 2000 consulenzas ed assistenza scu advocat e daspö il 2001 eir scu notar a cliaints privats, impraisas da famiglia e vschinaunchas – e que in chosas dal dret reel, dret d’ierta, dret dals bains matrimoniels, dret da contrats, domiciliaziuns ed impostas pauschelas, dret da societeds, dret da fabrica e planisaziun e dret d’administraziun.
Riet Ganzoni, naschieu dal 1967, ho glivro dal 1993 sieu stüdi da la giurisprudenza cul licenziat a l’Universited da Turich. In seguit ho’l lavuro scu auditur e secretari tal tribunel districtuel a Horgen e tal tribunel superiur dal chantun Turich, aunz cu s’acquister dal 1996 la patenta d’advocat dal chantun Turich. Per duos ans ho’l alura lavuro in ün’advocatura granda zürigaisa.
Dal 1999 ho Riet Ganzoni absolt ün stüdi supplementer a la London School of Economics and Political Science (LSE) a Londra e ragiunt il diplom da master in giurisprudenza (LL.M). Zieva sieu retuorn in Engiadina s’ho’l acquisto la patenta da notar dal chantun Grischun. A partir dal 2000 ho Riet Ganzoni lavuro per l’advocatura Zinsli & Nater, a partir dal 2008 scu partenari da l’advocatura Zinsli Nater Ganzoni.
Dal 2012/13 ho Riet Ganzoni absolt la scolaziun FSA a las Universiteds da Turich e Lucerna per gnir specialist dal dret d’ierta.
Dal 2019 ho el, insembel cun Ramiro Pedretti, fundo l’advocatura e notariat Ganzoni & Pedretti SA a San Murezzan.
Riet Ganzoni discuorra e scriva curraintamaing tudas-ch, inglais, rumauntsch, taliaun e frances. El es commember da la Federaziun grischuna e svizra d’advocats scu eir da la Federaziun grischuna e svizra da notars. Dal 2001 al 2006 è’l sto commember da la suprastanza da la Federaziun grischuna da notars, dal 2002 al 2009 commember da la cumischiun da fabrica da Samedan scu eir president dal PLD e dal 2003 al 2009 vicepresident da l’Uniun dals Grischs. Sper sia lavur professiunela as prasta Riet Ganzoni actuelmaing scu commember da la suprastanza cumünela da Schlarigna e scu president dals vschins da Schlarigna.